పార్టీ ద్రోహులు చరిత్రహీనులుగా మిగిలిపోతారు: చంద్రబాబు

గత కొన్నిరోజులుగా టీడీపీలో సమీకరణాలు మారిపోతున్నాయి. ప్రకాశం జిల్లా నేతలు వైసీపీలోకి వలసలకు రంగం సిద్ధం చేసుకుంటున్నారు. మాజీ మంత్రి శిద్ధా రాఘవరావు తన కుటుంబ సభ్యులతో కలిసి రేపు వైసీపీ తీర్థం పుచ్చుకుంటారని ప్రచారం జరుగుతోంది.

ఈ నేపథ్యంలో టీడీపీ అధినేత చంద్రబాబునాయుడు ఆన్ లైన్ లో పార్టీ నేతలతో మాట్లాడారు. ఈ సందర్భంగా వ్యాఖ్యానిస్తూ, పార్టీకి ద్రోహం చేసిన వారిపట్ల అప్రమత్తంగా ఉండాలని అన్నారు. పార్టీకి ద్రోహం చేసినవాళ్లు చరిత్రహీనులుగా మిగిలిపోతారని స్పష్టం చేశారు. పార్టీకి ద్రోహం చేసిన వారెవరినీ ప్రజలు ఆదరించరని, ద్రోహులకు ఎంత దూరంగా ఉంటే అంత మంచిదని పేర్కొన్నారు.